Àndà
À circà le sponde porghe,
Sgranate in l’idea di ciò chì pare,
Duve tuttu hà più valore,
Duve e sfiere ùn sò amare
À e stonde di u campà.

Àndà
À scavà « e ciare di l’oru »
Arrebiite à l’ochju di a miseria
Duve spadanscianu le brame,
Duve piccianu i sonnii
À e muche di u campà.

Ma vultà
À fà ghjorni novi
Zuccati in u scogliu di a memoria
Duve maturanu li detti,
Duve crescenu li fatti
À u sole di u campà

Andà
À murà castelli è torre
Innalzati in e teppe di u sperà,
Duve s’intananu i lumi
Di quellu chì cerca sale
À i venti di u campà

Cristofanu FILIPPI
U 4 d’agostu di u 1999

Issu scrittu l’aghju dinù messu in canzona
è hè statu arrigistratu nantu à u 2du discu
di L’Attraghju, « Infucià si » esciutu in u 2017

L’Attrachju – « Infucià si » – 2017