Archives de la catégorie Puesia

Natu da u silenziu

Amicu fidatu, lu silenziu, Daretu à issi muri Custodii è testimoni, Si face paceru.

Amicu fidatu, lu silenziu, Daretu à issi muri Custodii è testimoni, Si face paceru.

Natu da u silenziu

 

Amicu fidatu, lu silenziu,
Daretu à issi muri
Custodii è testimoni,
Si face paceru.
U timore piglia licenziu
È l’astutu apre l’oscuri,
L’anima di issi rughjoni
Toglie u penseru.

È a pace si sfascia
Per e sale di lu castellu
Induve ci passi serena,
Sultana di issi cuntorni.
U batticore rinasce
In lu mio pettu zitellu,
Ci ai cacciatu ogni pena,
Donna di li mo ghjorni.

U silenziu, amicu fidatu
Di a carezza piattata,
Dà vita à l’ispensata
À a stonda ch’aghju speratu.

Cristofanu FILIPPI
U 23 d’ottobre di u 2015

Poster un commentaire

Ballu silenziu

Ballu Silenziu

Ballu silenziu

 

E stelle ?
Ma chì misteriu !

Fatte di lume
Chì v’accumpagna
À l’ore pagne.
Tantu luntane,
Cusì cumplice,
Ancu cumare
S’ella li pare.
Si piattanu
O s’affaccanu,
Passanu è venenu,
Po si ne vanu,
Ma mai indarnu.
Ingiru à la luna
Sò ballarine,
Per dà magia
È sunniate,
Stonde meravigliate.
U so ballu silenziu
Hè una lingua
In li nostri ochji
Affascinati.

E stelle ?
Ma chì misteriu !

Cristofanu FILIPPI
U 6 d’ottobre di u 2015

Poster un commentaire

Una pace

Pace

Una pace

 

A sfiera hà un’ altra corsa
Oghje.
L’ore a si scialanu
À u ritimu di issu passu
Chì si gode la stonda.

A luce hà un altru culore
Oghje.
Verdi sò li so ochji
È u sole, appena ghjelosu,
A si trinneca à spuntà.

A vita hà un altru sapore
Oghje.
A muntagna chì ride
Pare ch’ella mandi in rigalu
A pace à lu mondu sanu.

Cristofanu FILIPPI
U 4 d’ottobre di u 2015

Poster un commentaire

Anima

AnimaAnima

 

U meiu l’ideale
U m’anu lasciatu per tè
Quelli chì, prima chè mè,
Anu muratu issa terra
Da fiuminale à la sarra.
U meiu l’ideale
U m’anu lasciatu per tè…

A meia la virsura
A m’anu insignata per tè,
Quelli chì ebbenu piacè
À dà capu à u bisognu
Senza chere lu ritornu.
A meia la virsura
A m’anu insignata per tè…

I mei li sapè
I m’anu amparati per tè
Quelli chì senza avè
Datu manu à i libroni,
Sapianu patta è toni.
I mei li sapè
I m’anu amparati per tè…

E meie le rivolte
E m’anu inspirate per tè
Quelli chì cum’è mè
Anu lu sangue in bullore
S’ellu hè inghjustu lu dulore.
E meie le rivolte
E m’anu inspirate per tè…

E meie le canzone
Fà le ribumbà per mè !
Ad ogni generazione
Dì li chì ùn ci hè tempu scorsu
È canta o populu corsu
L’anima di issa nazione !

Cristofanu FILIPPI
u 6 di dicembre di u 2012
Issu scrittu hè statu messu in canzona per Canta u Populu Corsu
da Jean-Do LECA in u 2012
è arrigistratu nantu à u discu « Altri menti »

Canta u Populu Corsu - 2013

Altri Menti – Canta u Populu Corsu – 2013

Poster un commentaire

Rosula nera

Rosa Parks

« Ride a vita in lu to core, amore datu… »

Rosula nera

in memoria di Rosa Parks

Cun l’anima
frolla
d’una rosula nera,
sì quella chì và
sola,
attenta à tene caru.

Tù, dici chì
l’amore
hè una fola vera
per quelli chì,
di core,
ne vanu à passu paru.

 

Quandu ogni ghjornu,
senza mancà,
lampa à lu ventu
la so pietà,
ti vene l’arte
di ricusà
l’odiu chì si vole
spannà.

Canta u mondu in li to ochji,
amore natu…
Ride a vita in lu to core,
amore datu…

A to pelle
mora
hè cum’è issa carezza
chì lebbia si cala
fora
di li chjassi permessi…

Rosula negra,
issu culore
ùn hè la to tristezza,
chì in l’ochji di u Supranu,
i fiori
li sò tutti listessi !

Cristofanu FILIPPI
U 4 di marzu di u 2010
Issu scrittu l’aghju dinù messu in canzona in u 2010 è
hè statu arrigistratu nantu à u primu discu di
Francine MASSIANI, « Donna fata » in u 2010
http://www.francine-massiani.com

Francine Massiani - "Donna fata" Nov 2010

Ascultà « Rosula nera » nantu à DEEZER

Poster un commentaire

Spechji

Spechji

" À l'onde vogliu dà, a scelta di l'andà.... "

Spechji

 

Cunfidà vogliu à u mare
a robba di tempu fà,
i sintimi trafatti
è tuttu ciò chì fù
un parè di benestà…

 

À l’onde vogliu dà
a scelta di l’andà,
di i porti da truvà
per tante speranze errente
senza duvintà…

Andate ricordi,
ùn vogliu sunnià…
L’amore ùn aspetta
è li vogliu parlà…

 

Vi vogliu lascià fà
a strada chì vi và,
quella chì u mio passu
ùn sapia seguità
senza dubbità…

 

Cunfidà vogliu à isse mani
e chjave da girà,
i sintimi bramati
è tuttu ciò chì hè
u mo benestà.

 Andate ricordi,
ùn vogliu sunnià…
L’amore ùn aspetta
è li vogliu parlà…

Cristofanu FILIPPI
u 22 di nuvembre di u 2009
Issu scrittu l’aghju dinù messu in canzona in u 2010
è hè statu arrigistratu nantu à u primu discu
di Francine MASSIANI« Donna fata » in u 2010
http://www.francine-massiani.com

Francine Massiani - "Donna fata" Nov 2010

Ascultà "Spechji" nantu à DEEZER


Poster un commentaire

I mo viaghji

I mo viaghji

"Cum'è u sole chì s'infiara è m'invita à vogulà..."

I mo viaghji

 

Inde l’azuru basgia l’onde
tante loche vogliu sfascià.
Danu fiatu à le mo brame
di sfugà mi à spaisà…
Batte celi, mari è terre
hè quessa a mo libertà…

 

I mo viaghji :
belli è beati
chì, in lu mo core,
t’aghju sempre cun mè…

E mo scappate
sò furtunate
è lu mo amore
ingranda à più pudè…

 

Cum’è u sole chì s’infiara
è m’invita à vogulà,
vogliu abbraccià le cunfine,
rinvivisce è po vultà !
Sente cresce lu mo esse
hè quessa a mo verità…

 

I mo viaghji :
belli è beati
chì, in lu mo core,
t’aghju sempre cun mè…

E mo scappate
sò furtunate
è lu mo amore
ingranda à più pudè…

Cristofanu FILIPPI
u 23 d’ottobre di u 2009
Issu scrittu hè statu fattu nantu à una musica
di Dédé SEKLI
è hè statu arrigistratu nantu à u primu discu di
Francine MASSIANI, « Donna fata » in u 2010
http://www.francine-massiani.com

Francine Massiani - "Donna fata" Nov 2010

Ascultà "I mo viaghji" nantu à DEEZER

Poster un commentaire

%d blogueurs aiment cette page :