"In u celu di e mo speranze..."

Bramalbe

À l’orizonte di e mio stonde
Ci nasce un sole
Chì spinghje a notte
di e ferite

In u celu di e mo speranze
Ci luce una stella
Chì accende a vita
Rinvivita

In u silenziu di e mio brame
Ci canta una voce
Chì disceta i sonnii
Di u benestà

Cristofanu FILIPPI
u 24 d’aprile di u 2009

" U rè di u mio mondu sì tù ! "

À basgiavita

À babbu

U rè di u mondu sì tù !
A mudestia per bandera
sventuleghja
in li to ochji fieri.

Le to mani in oru,
da la carezza à u straziu,
anu inghjennatu mondi
cun l’amore è u rispettu
per lege sole.

Arrittu, sempre,
nè acqua, nè ventu
nè focu, nè dispettu
t’anu fattu ingrunchjà.

È lu to core batte
à basgiavita
cun la to regina à fiancu
à fiurisce li to ghjorni.
È lu to amore chjocca,
quant’è issa tintenna grossa
scelta un ghjornu di fiera,
è ribomba per isse creste…

U rè di u mio mondu sì tù !

Cristofanu FILIPPI
u 21 d’aprile di u 2009

" ... à curà le to virtù cun pazienza infinita..."

A to fata 

Stringhji mi forte in pettu
è piglia u mio calore…
Per una criatura
ùn ci hè più bellu lettu
chè quellu di l’amore
ad appacià la paura.

 Dormi o caru…
Seraghju a to fata
è canteraghju
tutta la nuttata
per fà ti scorta
sinu à l’alburighjata,
Dormi o caru, dormi…

In u celente quassù,
per tutta la to vita,
ci lucerà una stella
à curà le to virtù
cù pazienza infinita,
à imbellì a to stradella.

Si spanna lu mio core
in issa stonda serena,
à tene in la mio manu
u fiore di l’amore
chì in a mo vita sumena
u so più dolce veranu.

Cristofanu FILIPPI
u 18 d’aprile di u 2009
Issu scrittu l’aghju dinù messu in canzona
è hè statu arrigistratu nantu à u primu discu
di Francine MASSIANI, « Donna fata » in u 2010
http://www.francine-massiani.com

Ascultà "A to fata" nantu à DEEZER

Sfumature

Ùn fighjate u surrisu
chì face accinta
à lu mo visu,
hè solu una manera,
appena finta,
di fà cum’è s’eo era.

Innò chì ùn hè dulcezza
ind’è issu sguardu !
Serà tristezza
di vede tutte isse ore
basgià l’azardu
da dissuchjà u core.

Vi pare maraviglia,
scenza infinita…
Ma hè riviglia,
quella di l’omu stancu
chì campa a vita
senza tene la à fiancu.

Cristofanu FILIPPI
u 13 d’aprile di u 2009