"È mi bollenu i sensi à sapè li perchè... à sapè ùn sò chè..."

Rembu à i mo fiaschi

Arrembatu à i mo fiaschi,
una stonda,
l’astutu si sdrughje
in u viotu
chì mi circonda.
È mi bollenu i sensi
à sapè li perchè,
à sapè le ragiò,
à sapè…
ùn sò chè.

A mo carne si cunsuma
à scandellera,
cum’è issu chjodu
rughjinosu
ch’ella si rode a mosca
da tanti è tanti anni.

È issu viotu à l’intornu
chì mi stringhje,
mi stringhje
è mi surpa l’ansciu
da fà mi le cappià
isse parolle,
quelle pensate
mai dette,
tenute…
à mutesca.

U mio core si cunsuma
à sfracellera
cum’è issa carne
fiacca
ch’ella si rode a vita
da tanti è tanti anni.

Cristofanu FILIPPI
u 10 di marzu di u 2006