U francà di e stagione

Spadanscia a mio muntagna sottu à a vampa di u sole.
U mintrastu di lu so muscu incuruneghja lu maticciu
chì s’infiara sopra a frasca di u mantellu castagnicciu
à sinu à la rinfriscata di una nottata di fole,
cun l’eternu passatempu di lu celu di l’estate
chì m’arrega lu serenu di e so stelle suminate.

Invechja la mio muntagna in un vestitu russicciu.
U muscu di e mele, poste in la filetta secca,
accarezza incù dulcezza u paese chì rinfresca
gudendu si lu raghju di u sole tricatricciu,
quandu a sarra pianu pianu si tira un velu grisgignu
nantu à a valle chì cuntrasta incù lu chjarore vicinu.

S’ingronchja a mio muntagna sottu à a neve chì si chjina.
à l’aggrottu di lu vetru, affuscatu di vapore,
schjuppitteghja un ceppicone chì rigala u so calore ;
al di fora u celu grisgiu pare falà ne in pulvina.
U cunfortu di una casa eiu sò quant’ellu vale
quandu in un dolce silenziu s’accampa u tempurale.

Rinvivisce a mio muntagna in una carezza verde.
L’amanduli sbucciati chjamanu li benedetti,
cola lu rossu suchjosu di li chjarasgi amaretti,
luntanu ferraghju scuru è le to ghjurnate frete !
da tandu un solcu tiratu dà speranza à li mio sogni :
Imbellisce mi la vita chì accarezza li mio ghjorni.

Ùn muta un palmu a mio muntagna franchendu tante stagione.
Eiu invechju à fiancu à ella fendu li da testimone,
tutti l’anni chì s’ammansanu maturiscenu u mio campà
è cun tè la mio cumpagna quellu mondu vogliu varcà.

Cristofanu FILIPPI
Maghju di u 2001
Issu scrittu hè statu messu in canzona da u gruppu Surghjenti in u 2003
è arrigistratu nantu à u discu « Orma »
http://www.surghjenti.com 

"Orma" Maghju 2003 - Surghjenti