"L'aghju sappiuta tandu... à tempu à tè."

Lux Æterna

Prima di tè
ùn la sapia.
U mio mondu era di silenziu tamantu.
È isse notte,
di viotu tessute,
andavanu
à passu cutratu
rembu à la mio pelle,
sempiterne…

Prima di tè
ùn a pudia sapè.
Nè guerre nè paci mi facianu trimà.
E cerbelle,
peste di matrucate,
stacciavanu
à grombu straziatu
u tempu greve di nebbia,
crudele…

Si hè fatta lebbia
a luce
ad appacià
u sborru di sensi.
Linda, luminosa
è sincera
cum’è issa mane
d’inguernu.

L’aghju sappiuta
tandu…
à tempu à tè.

Cristofanu FILIPPI
u 26 di lugliu di u 2006

Vanu surelle

A luna fascia serena
A so luce di seta,
U mare stà fermu,
Una stonda,
Ad ascultà la muraglia
Rigalà à e stelle
U to cantu
À lu meiu intricciatu.

A mio voce chjama a toia
È vanu di paghju
À intrunà l’orizonte
Luntanu.
Una nota piglia l’altra
È vanu surelle
L’isule
À basgià u Terraniu.

Cristofanu FILIPPI
u 17 di lugliu di u 2006