Ballu silenziu

E stelle ?
Ma chì misteriu !

Fatte di lume
Chì v’accumpagna
À l’ore pagne.
Tantu luntane,
Cusì cumplice,
Ancu cumare
S’ella li pare.
Si piattanu
O s’affaccanu,
Passanu è venenu,
Po si ne vanu,
Ma mai indarnu.
Ingiru à la luna
Sò ballarine,
Per dà magia
È sunniate,
Stonde meravigliate.
U so ballu silenziu
Hè una lingua
In li nostri ochji
Affascinati.

E stelle ?
Ma chì misteriu !

Cristofanu FILIPPI
U 6 d’ottobre di u 2015