"Una manu livera si tende da lu biancu à lu neru..."

Sognu vivu

à Martin Luther King

In lu turchinu
chì s’accampa
sò mosse tante stelle
è corre lu sussuru
d’una sunniata
ardita.

Una manu livera
si tende
da lu biancu à lu neru,
dendu fiatu à l’attese
di tante vite
scantate.

A to parolla
cusì scema
u ventu l’hà purtata
à suminà l’astutu,
ad appianà
li termini.

L’averanu puru
amattatu
u metallu infiaratu
chì ti tolse u fiatu.
U to sonniu
si hè vivu
è la to pelle negra
onora la mio bandera !

Cristofanu FILIPPI
u 10 di dicembre di u 2008

" È lu mio core s’intana à tornà petra bullita... "

Petra bullita

U marosu si hà pigliatu
i grombuli unu à unu,
tirendu si senza stacciu
a rena à tempu à la vistia
d’ogni passu di toiu
ch’eo avaria fattu meiu.

Aghju l’anima sfasciata
da u sintimu accattanu
chì dumane sia andatu
à truvà un’ altra strada,
Togliendu l’orizonte
Ch’eo tenia per la manu.

È lu mio core s’intana
à tornà petra bullita.
Sculpita à centu pezzi
da una staffilata schjetta,
ùn vogliu dà la à nimu,
issa ferita hè a meia !

Cristofanu FILIPPI
u 5 di dicembre di u 2008
Nota Bene : a petra bullita hè una petra ingullita da un arburu chì li cresce in giru.

From here to eternity

Per u sempre

Per issa stonda
à trimulera
contru à a to pelle di seta,
e nostre lingue cummare,
una carezza
piglia l’altra…
Ti tengu cara

Per quelli ochji
verdi di lume
aperti à riceve mondi
ch’è n’avemu battutu in dui
u to core
in paru à lu meiu…
Ti tengu cara

Per issu dumane
appesu in dà
stuvigliu lampatu in mare
spaziu tamantu à cerniglià
a rena fila…
per u sempre
Ti tengu cara

Cristofanu FILIPPI
u 5 di dicembre di u 2008

Ad azzicà

Oh nun dà capu à lu ventu
Chì fischja è suspira quallà.
U nostru focu ùn serà spentu
Mammata l’hà da accatizzà.
Dormi dormi o Ciucciunà
Chì u ventu hà da stancià.

Lu to babbu l’hà turnate
In chjostra le caprerelle
Ci sò cedie cun muvrate,
Collate cun lotinelle
Dormi dormi o Ciucciunà
Chì u to babbu hà da vultà

A neve per la muntagna
Stende lu so fasciu biancu
Face trinnicà l’altagna
U falcu cun lu filanciu
Dormi dormi o Ciucciunà
Chì la neve hà da scutrà

Cun la luna tante stelle
Si stanu tutte à curà :
Feghjanu le ciucciarelle
E si volenu veculà.
Dormi dormi o Ciucciunà
Chì la luna hà da veghjà.

Dormi pur’ cara zitella
Per tè mammone canterà
Di tutte sì la più bella
Fior’ di mamma è di babbà
Dormi dormi o Ciucciunà
Ci hè mammone ad azzicà

Cristofanu FILIPPI
u 4 di dicembre di u 2008
Prova di scrittura d’una nanna nantu à u modu « tradiziunale »