Fior’ di Stella

S’era pisatu lu sole
Quella mane sopra à l’onde
Quandu pianu li ventulelli
Carezzavanu e sponde
Chì lu fischju di l’ocelli
Mi contava duie fole.

M’arricordu quellu ghjornu
Le mio pene sò smarite
Ci era in l’aria un incantu
Chì hà guaritu e mio ferite
Si hè schjaritu lu mio cantu
In stu mumentu eternu.

In u fiume chì curria
Aghju intesu una voce
Chì parlava d’una stella
Nata per purtà la pace
In core d’una zitella
U so lume risplendia

È issa voce discitava
Ghjuvanotti è vechjaconi
Ribumbava la nutizia
Per li valli è li valloni
Li purtava l’amicizia
È incù fede spurgulava :

Chì lu mondu si disceti
Per vede quella zitella
Ch’elli nascinu terzetti
È ancu qualchì paghjella
Stu ghjornu ch’ellu si festi
Oghje hè nata Fior’ di Stella.

Cristofanu FILIPPI
u 28 d’aprile di u 1993
Issu scrittu l’aghju messu in canzona in u 1993 per u gruppu Esse 
è hè statu arrigistratu nantu à u so primu discu
« Franchendu issu passu »  in u 1995

"Franchendu issu passu" Nov 1995 - Esse

"... Di isse muntagne materne, ch'è tù tocchi s'è tù mi basgi..."

È seremu

À l’incantu d’una notte,
di a pace, d’una risa,
vecu issu visu zitellinu
chì empie d’amore lu mio esse.

È sò…

Sò d’acqua linda è pura
di isse muntagne materne
ch’eo tengu quant’eo ti tengu,
ch’è tù tocchi s’è tù mi basgi.

È sì…

Sì di l’avvene ch’eo feraghju
à u frisgiu d’una penna
chì ci scriverà dumane à u plurale
cum’è vita si scrive in dui.

È seremu ! 

Cristofanu FILIPPI
u 10 di ferraghju di u 1993
Issu scrittu l’aghju dinù messu in canzona in u 1999 è
hè statu arrigistratu nantu à u primu discu di
Francine MASSIANI, « Donna fata » in u 2010
http://www.francine-massiani.com 

Ascultà "È seremu" nantu à DEEZER

Ricordi zitellini

Stonde di gioie la sera
In i fuconi fumicosi
Incù le fole dopu cena
Accantu à la brosta rossa
È dopu in a notte nera
Si diventa paurosu.

Babbone contava storie
Incù mammone à la pignatta
Mamma ella sempre fora
Curava la so infurnata
Babbu sempre in la machja
Turnava la so bandata

E stonde sottu à i castagni
À ombria è à sulia
Incù le spine in la manu
O quant’ellu si suffria
Un basgiucciu di mammone
È tandu si ripartia.

O le stonde per li prati
À rotte à fughje in le filette
Ghjunghjiamu tuttu sfiatati
À l’orlu di lu « Puzzettu »
È tandu quelle inciuffate
Facianu i più belli effetti.

Eppo le stonde spaventu
À la ghjunta di l’inguernu
Tandu soffiava lu ventu
È ci portava l’affannu
Mamma è babbu à lu tempu
Ùn devianu dà capu.

Isse stonde oghje sò finite
Ancu e fole sò fughjite
Noi simu bè ingrandati
È qualcosa avemu capitu
Chì la vita hè ingrata
È chì nunda hè graditu.

Cristofanu FILIPPI
Ottobre di u 1990
Issu scrittu hè statu messu in canzona in l’annate 90
da Federicu POGGI per u gruppu Esse 
chì l’hà arrigistrata nantu à u so primu discu
« Franchendu issu passu »  in u 1995

"Franchendu issu passu" Nov 1995 - Esse