Cristofanu FILIPPI

Cet utilisateur n'a partagé aucun renseignement biographique

Page d'accueil: https://chfilippi.wordpress.com

Da luntanu…

Da luntanu

"... di speranza rinuvata..."

Da luntanu…

 

 

Ogni parolla mandata
hè trattu d’aria pura,
di speranza rinuvata
per la vita futura,
Prumessa fatta à chjar’ di luna :
Di duie anime fà ne una…

 

 

Cristofanu FILIPPI 
u 14 di settembre di u 2009

Poster un commentaire

Mondi

Goccia

"L'avete mai fighjata una goccia d'acqua da vicinu ?..."

Mondi

L’avete mai fighjata una goccia d’acqua da vicinu ? Avete rimarcatu a perfezzione di e so curve ? L’armunia di e so forme ?
Forse averete rimarcatu cum’ella hè capace à piglià si u lume in giru è à restituì lu ancu più bellu in u rispechju di a so tralucenza.
S’è vo’ ci fate casu, ci pudete vede culori di tutte e mamme, Diu ci hà di sicuru untu u so pinellu per fà quelli di a terra è di u celu.
Accade ancu, quandu omu ci ciotta un sguardu appena più curiosu o forse più passiunatu, di vede nasce mondi in issa gocciuccia d’acqua…
À dì la franca, eiu, ùn aghju mai vistu da vicinu gocce d’acqua. Ma quandu vecu luce i so ochji, ùn hè micca una goccia chì mi si pare di vede, ma un oceanu…

Cristofanu FILIPPI 
U 27 di lugliu di u 2009

Poster un commentaire

Donna

Donna

"È mi lasciu purtà in i to sogni scemi..."

Donna

 

A sò ch’è tù a sai,
ùn ci hè bisognu à dì…
À sente li to ochji
mi s’aprenu i mondi,
bramati dapoi stonde
appese à u tempu,
quelli di e fole
chì incantanu a zitella,
quelli di a vita
chì mi feranu Donna…

 

È mi lasciu purtà
in li to sonnii scemi
dendu ti la manu
seguitu lu to versu.
Donna fata,
Donna fatta,
Donna…

 

A sò ch’è tù a sai,
ùn ci hè bisognu à dì…
A dicenu e to mani :
a carezza ch’è tù teni
hè tantu amore à dà
in partu di benestà
amore di a fola
chì incanta a zitella
amore di a vita,
diventeraghju Donna…

 

È mi lasciu purtà
in li to sonnii scemi
dendu ti la manu
seguitu lu to versu
Donna fata
Donna fatta
Donna…

Cristofanu FILIPPI
u 28 di ghjugnu di u 2009
Issu scrittu hè statu messu in canzona da Patrizia Gattaceca
è hè statu arrigistratu nantu à u primu discu
di Francine MASSIANI« Donna fata » in u 2010
http://www.francine-massiani.com

Francine Massiani - "Donna fata" Nov 2010

Ascultà "Donna" nantu à DEEZER

Poster un commentaire

À brusgianima

 

Carezza

"E mo dite orfane cercanu..."

À brusgianima

 

E mo dite orfane
cercanu
a vistia di a to pelle
in issu silenziu
saziu
di u so lagnu mutu.
È s’infiaranu,
à brusgianima,
cum’è i ricordi
si cunsumanu
à u sbucinu di u tempu…

 

 

Cristofanu FILIPPI
u 31 di maghju di u 2009

Poster un commentaire

Basgiu di luna

Basgiu

" Eiu è tù... cun a luna... è l'eternità... "

Basgiu di Luna

 

S’è la pudessi parlà appena
a luna,
Ella chì cura quassù
è chì veghja
nantu à le nostre carezze
care care…
Ch’è la ti dica lu bè
ch’eo ti vogliu

Dà mi la to manu
è basgia la mio pelle,
e stelle
voganu di tondu
à l’amore ch’è tù mi dai…
Sta sera,
eiu è tù,
ci feremu di issa stonda
un’ eternità…

 

Sottu à issu dolce luciore
di seta,
nasconde issu tesoru
cun tè
vale tutte le canzone
d’amore
per dì ti :
Ti tengu caru

Dà mi la to manu
è basgia la mio pelle,
e stelle
voganu di tondu
à l’amore ch’è tù mi dai…
Sta sera,
eiu è tù,
ci feremu di issa stonda
un’ eternità…
Eiu è tù
è le stelle à l’intondu…
Eiu è tù,
cun a luna
è l’eternità… 

Cristofanu FILIPPI
U 3 di maghju di u 2009
Issu scrittu hè statu fattu nantu à una musica
di Dédé SEKLI
è hè statu arrigistratu nantu à u primu discu di
Francine MASSIANI, « Donna fata » in u 2010
http://www.francine-massiani.com

Francine Massiani - "Donna fata" Nov 2010

Ascultà "Basgiu di luna" nantu à DEEZER

Poster un commentaire

Bramalbe

Arcu marinu

"In u celu di e mo speranze..."

Bramalbe

 

À l’orizonte di e mio stonde
Ci nasce un sole
Chì spinghje a notte
di e ferite

 

In u celu di e mo speranze
Ci luce una stella
Chì accende a vita
Rinvivita

 

In u silenziu di e mio brame
Ci canta una voce
Chì disceta i sonnii
Di u benestà

Cristofanu FILIPPI
u 24 d’aprile di u 2009

Poster un commentaire

À basgiavita

Rè di u mondu

" U rè di u mio mondu sì tù ! "

 

À basgiavita

À babbu

 

U rè di u mondu sì tù !
A mudestia per bandera
sventuleghja
in li to ochji fieri.

 

Le to mani in oru,
da la carezza à u straziu,
anu inghjennatu mondi
cun l’amore è u rispettu
per lege sole.

 

Arrittu, sempre,
nè acqua, nè ventu
nè focu, nè dispettu
t’anu fattu ingrunchjà.

 

È lu to core batte
à basgiavita
cun la to regina à fiancu
à fiurisce li to ghjorni.
È lu to amore chjocca,
quant’è issa tintenna grossa
scelta un ghjornu di fiera,
è ribomba per isse creste…

 

U rè di u mio mondu sì tù !

 

Cristofanu FILIPPI
u 21 d’aprile di u 2009

Poster un commentaire

A to fata

A to fata

" ... à curà le to virtù cun pazienza infinita..."

A to fata 

 

Stringhji mi forte in pettu
è piglia u mio calore…
Per una criatura
ùn ci hè più bellu lettu
chè quellu di l’amore
ad appacià la paura.

 Dormi o caru…
Seraghju a to fata
è canteraghju
tutta la nuttata
per fà ti scorta
sinu à l’alburighjata,
Dormi o caru, dormi…

 

In u celente quassù,
per tutta la to vita,
ci lucerà una stella
à curà le to virtù
cù pazienza infinita,
à imbellì a to stradella.

 

Si spanna lu mio core
in issa stonda serena,
à tene in la mio manu
u fiore di l’amore
chì in a mo vita sumena
u so più dolce veranu.

Cristofanu FILIPPI
u 18 d’aprile di u 2009
Issu scrittu l’aghju dinù messu in canzona
è hè statu arrigistratu nantu à u primu discu
di Francine MASSIANI
« Donna fata » in u 2010
http://www.francine-massiani.com

Francine Massiani - "Donna fata" Nov 2010

Ascultà "A to fata" nantu à DEEZER

Poster un commentaire

Sfumature

SfumatureSfumature

 

Ùn fighjate u surrisu
chì face accinta
à lu mo visu,
hè solu una manera,
appena finta,
di fà cum’è s’eo era.

Innò chì ùn hè dulcezza
ind’è issu sguardu !
Serà tristezza
di vede tutte isse ore
basgià l’azardu
da dissuchjà u core.

Vi pare maraviglia,
scenza infinita…
Ma hè riviglia,
quella di l’omu stancu
chì campa a vita
senza tene la à fiancu.

Cristofanu FILIPPI
u 13 d’aprile di u 2009

Poster un commentaire

Brama scunciata

Brame

E vulia vede e sumiglie, da li to ochji neri à le mo riviglie, à dà mi ghjorni fieri...

Brama scunciata

 

L’avia lasciate vene,
in core meiu, l’ore belle
di basgi longu à la to pelle
à sente corre in le to vene
u mo sangue cun l’amore
da fà ti omu à batticore.
E vulia vede e sumiglie,
da li to ochji neri
à le mio riviglie,
à dà mi ghjorni fieri.

 

Di tene ti a manu
stretta stretta
in la mio manu
si ferma brama schjetta
di li mo sogni landani,
spera senza lindumani,
oramai stantarata
in a risa innamurata
di issu ritrattu vechju
aggrancatu à u spechju.

 

Cristofanu FILIPPI
u 28 di marzu di u 2009

Poster un commentaire

%d blogueurs aiment cette page :