Cristofanu FILIPPI

Cet utilisateur n'a partagé aucun renseignement biographique

Page d'accueil: https://chfilippi.wordpress.com

Luntananze

Luntananze

"Campu cù a speranza di a porta chì s'apre... u gustu di e to lapre..."

Luntananze

 

A porta si stà chjosa.
In casa, tutta di viotu,
u silenziu a si posa
è mi conta, devotu,
a mancanza di tè.
Ogni stonda chì cola,
cun tè luntanu da mè,
hè d’amarezza in gola,
un librone d’ohimè
à sfuglittà mi sola.

 

Cum’è una buscica
cappiata
da qualchì zitellacciu,
u mio core và
à l’asgiu di u ventu
è canta,
à quale vole sente,
i ghjorni senza tè…

 

Campu cù a speranza
di a porta chì s’apre,
u calore di a presenza,
u gustu di le to lapre
da toglie a luntananza…
Ma a porta si stà chjosa,
cun tè luntanu da mè,
u silenziu a si posa
cù u librone di l’ohimè
ed eiu senza tè…

Cristofanu FILIPPI
u 2 di ferraghju di u 2009
Issu scrittu hè statu messu in canzona da Patrizia Gattaceca
è hè statu arrigistratu nantu à u primu discu
di Francine MASSIANI« Donna fata » in u 2010
http://www.francine-massiani.com

Francine Massiani - "Donna fata" Nov 2010

Ascultà "Luntananze" nantu à DEEZER

Poster un commentaire

Sognu vivu

Martin Luther King

"Una manu livera si tende da lu biancu à lu neru..."

Sognu vivu

à Martin Luther King

 

In lu turchinu
chì s’accampa
sò mosse tante stelle
è corre lu sussuru
d’una sunniata
ardita.

 

Una manu livera
si tende
da lu biancu à lu neru,
dendu fiatu à l’attese
di tante vite
scantate.

 

A to parolla
cusì scema
u ventu l’hà purtata
à suminà l’astutu,
ad appianà
li termini.

 

L’averanu puru
amattatu
u metallu infiaratu
chì ti tolse u fiatu.
U to sonniu
si hè vivu
è la to pelle negra
onora la mio bandera !


Cristofanu FILIPPI
u 10 di dicembre di u 2008

Poster un commentaire

Petra bullita

Petra bullita

" È lu mio core s’intana à tornà petra bullita... "

Petra bullita

 

U marosu si hà pigliatu
i grombuli unu à unu,
tirendu si senza stacciu
a rena à tempu à la vistia
d’ogni passu di toiu
ch’eo avaria fattu meiu.

 

Aghju l’anima sfasciata
da u sintimu accattanu
chì dumane sia andatu
à truvà un’ altra strada,
Togliendu l’orizonte
Ch’eo tenia per la manu.

 

È lu mio core s’intana
à tornà petra bullita.
Sculpita à centu pezzi
da una staffilata schjetta,
ùn vogliu dà la à nimu,
issa ferita hè a meia !

Cristofanu FILIPPI
u 5 di dicembre di u 2008
Nota Bene : a petra bullita hè una petra ingullita da un arburu chì li cresce in giru.

Poster un commentaire

Per u sempre

Eternity

From here to eternity

Per u sempre

 

Per issa stonda
à trimulera
contru à a to pelle di seta,
e nostre lingue cummare,
una carezza
piglia l’altra…
Ti tengu cara

 

Per quelli ochji
verdi di lume
aperti à riceve mondi
ch’è n’avemu battutu in dui
u to core
in paru à lu meiu…
Ti tengu cara

 

Per issu dumane
appesu in dà
stuvigliu lampatu in mare
spaziu tamantu à cerniglià
a rena fila…
per u sempre
Ti tengu cara

 

Cristofanu FILIPPI
u 5 di dicembre di u 2008

Poster un commentaire

Ad azzicà

Ad azzicà

 

Oh nun dà capu à lu ventu
Chì fischja è suspira quallà.
U nostru focu ùn serà spentu
Mammata l’hà da accatizzà.
Dormi dormi o Ciucciunà
Chì u ventu hà da stancià.

 

Lu to babbu l’hà turnate
In chjostra le caprerelle
Ci sò cedie cun muvrate,
Collate cun lotinelle
Dormi dormi o Ciucciunà
Chì u to babbu hà da vultà

 

A neve per la muntagna
Stende lu so fasciu biancu
Face trinnicà l’altagna
U falcu cun lu filanciu
Dormi dormi o Ciucciunà
Chì la neve hà da scutrà

 

Cun la luna tante stelle
Si stanu tutte à curà :
Feghjanu le ciucciarelle
E si volenu veculà.
Dormi dormi o Ciucciunà
Chì la luna hà da veghjà.

 

Dormi pur’ cara zitella
Per tè mammone canterà
Di tutte sì la più bella
Fior’ di mamma è di babbà
Dormi dormi o Ciucciunà
Ci hè mammone ad azzicà

 

Cristofanu FILIPPI
u 4 di dicembre di u 2008
Prova di scrittura d’una nanna nantu à u modu « tradiziunale »

Poster un commentaire

Manu paterna

Manu paterna

" Manu frizione chì spachja dulcezza... "

Manu paterna

 

Manu ingrunchjata
da l’anni
pisii di strazii
à visticà
i versi
di lu legnu maestru

 

Manu saviezza
chì conta
e stonde è e stonde
ad ammansà
i ghjorni
chì scrignanu e carne

 

Manu frizione
chì spachja
dulcezza è calore
ad alliscià
a pelle
di quella anima cara

 

Manu paterna,
di core
u ti vogliu contà
è palisà
l’amore
tamantu ch’eo ti portu.

Cristofanu FILIPPI
u 28  di nuvembre di u 2008
Per Francine chì mi parlava di e mani di u so babbu bancalaru

Poster un commentaire

Silenziu…

Silenziu...

"Silenziu... ch'eo mi tengu..."

Silenziu…

à Francine chì l’ascultava

 

 

Silenziu di tante stonde
ch’eo mi tengu in secretu
ricordu chì si nasconde
in issu catagnellu chetu
da gode si lu serenu
d’un mumentu eternu…

 

 

 

 

 

Cristofanu FILIPPI
U 26 di nuvembre di u 2008

Poster un commentaire

In core à tè

In core à tè

 

A mio casa
centu volte l’aghju detta
di petra matticcia
murata
à l’asseccu.

 

A mio casa
mille volte l’aghju vista
tamanta
da nasconde lu mio amore
immensu…

 

Mai
a mi pensai,
a mio casa
ch’ella fussi…
u to core !

Cristofanu FILIPPI
u 6 d’agostu di u 2006

Poster un commentaire

Lux Æterna

Luce

"L'aghju sappiuta tandu... à tempu à tè."

Lux Æterna

 

Prima di tè
ùn la sapia.
U mio mondu era di silenziu tamantu.
È isse notte,
di viotu tessute,
andavanu
à passu cutratu
rembu à la mio pelle,
sempiterne…

 

Prima di tè
ùn a pudia sapè.
Nè guerre nè paci mi facianu trimà.
E cerbelle,
peste di matrucate,
stacciavanu
à grombu straziatu
u tempu greve di nebbia,
crudele…

 

Si hè fatta lebbia
a luce
ad appacià
u sborru di sensi.
Linda, luminosa
è sincera
cum’è issa mane
d’inguernu.

 

L’aghju sappiuta
tandu…
à tempu à tè.

Cristofanu FILIPPI
u 26 di lugliu di u 2006

Poster un commentaire

Vanu surelle

Vanu surelle

 

 

A luna fascia serena
A so luce di seta,
U mare stà fermu,
Una stonda,
Ad ascultà la muraglia
Rigalà à e stelle
U to cantu
À lu meiu intricciatu.

 

 

A mio voce chjama a toia
È vanu di paghju
À intrunà l’orizonte
Luntanu.
Una nota piglia l’altra
È vanu surelle
L’isule
À basgià u Terraniu.

 

 

Cristofanu FILIPPI
u 17 di lugliu di u 2006

Poster un commentaire

%d blogueurs aiment cette page :